Мамлакатимизда олий таълим тизимини ислоҳ қилиш, ёшларнинг кенг қатлами учун олий маълумот олиш учун катта имкониятлар яратилмоқда. Бугунги кунга келиб, мамлакатимизда юзга яқин нодавлат таълим муассасаларининг фаолияти йўлга қўйилганлиги ушюу фикрнинг яққол далилидир.
Ўз фаолиятини 2022 йил сентябрь ойида бошлаган Меҳнат ва ижтимоий муносабатлар Академияси ҳам иқтисодиётнинг турли соҳалари учун зарур бўлган мутахассисларни тайёрлашни ўз олдига мақсад қилиб олган.
Яратилаётган шарт-шароитларни кенг тарғиб этиш, аҳоли орасида зарур тушунтириш ишларини олиб бориш ёшларнинг олий таълим олишга бўлган қизиқишини ошириши шубҳасиз. Шу мақсадда, Меҳнат ва ижтимоий муносабатлар Академиясида талабалар учун яратилган шарт-шароитлар билан ёшларни яқиндан таништириш мақсадида “Очиқ эшиклар куни” тадбирларини ташкил этиш йўлга қўйилди.
Ушбу тадбирлар доирасида жорий йилнинг 17 апрел куни Миробод тумани, 18 апрел куни эса Мирзо Улуғбек туманида умумий ўрта таълим мактабларининг битирувчиларининг Академияга ташрифи ташкил этилди. Ташриф давомида битирувчи ёшлар Академияда яратилган шарт-шароитлар билан бевосита танишиш имкониятига эга бўлишди. Шу билан бир қаторда, Академия фаолияти, таълим муассасасида тайёрланаётган мутахассисликлар бўйича ўзларини қизиқтирган саволларга атрофлича жавоб олишди.
