Меҳнат ва ижтимоий муносабатлар академияси делегацияси Қирғиз Республикасига ташриф буюрди. Ташрифдан кутилган асосий мақсад, Қирғиз Республикаси Касаба уюшмалари федерацияси билан ҳамкорлик ўрнатиш, Меҳнат ва ижтимоий муносабатлар академиясида қирғиз мутахассисларини тайёрлаш масалаларини муҳокама қилиш саналади.
6 июл куни Ўзбекистон делегациясини Қирғиз Республикаси Касаба уюшмалари федерацияси раиси Эмиль Шурубекович Кызаев қабул қилди. Учрашув давомида Қирғиз Республикаси касаба уюшмалари фаоллари ва тармоқ касаба уюшмалари вакиллари учун Академиянинг тақдимоти ташкил этилди. Тақдимот жараёнида Академия вакиллари иштирокчиларни қизиқтирган барча саволларга жавоб беришди.
Шу куннинг ўзидаёқ томонлар касаба уюшмалари мутахассислари малакасини ошириш, “Меҳнатни муҳофаза қилиш ва саноат хавфсизлиги”, “Инсон ресурсларини бошқариш”, “Ижтимоий иш” ва бошқа йўналишлар бўйича малакали кадрлар тайёрлаш масалаларини муҳокама қилишди.
Учрашув якунлари бўйича касаба уюшмалари таълимининг етакчи халқаро стандартлари ва мамлакатларнинг миллий қонунчилиги асосида мавжуд таълим дастурларини яратиш бўйича келишувга эришилди ва икки томонлама ҳамкорлик тўғрисидаги меморандум имзоланди.
