Har bir oliy ta’lim muassasasining nufuzini, unda tahsil olayotgan talabalarning bilim va ko‘nikmalarini belgilovchi muhim jihatlardan biri axborot-resurs markazlari sanaladi. Ushbu markazlardagi kitob zahiralarining boyligi, taklif etilayotgan adabiyotlar ro‘yxatining kengligi kelgusida talabalarning mukammal ilm egallab, o‘z kasbining ustalari bo‘lib kamol topishining asosiy garovidir.
Aynan shu jihatlarni inobatga olgan holda, Mehnat va ijtimoiy munosabatlar Akademiyasida ham Axborot-resurs markazini muntazam ravishda boyitish, yangi adabiyotlar bilan to‘ldirishga katta e’tibor qaratib kelinadi. Axborot resurs markazi zahirasini boyitishda nafaqat yangi nashr etilgan kitoblarni xarid etish, balki mualliflar tomonidan Akademiyaga tuhfa qilingan kitoblar ham salmoqli ulush kasb etib bormoqda.
O‘zbekiston Respublikasi Oliy Majlisi Qonunchilik palatasi Spikerining birinchi o‘rinbosari, Inson huquqlari bo‘yicha O‘zbekiston Respublikasi Milliy markazining direktori, Akademik Akmal Xolmatovich Saidov Akademiya faoliyatini, xususan, unda amalga oshirilayotgan ilmiy tadqiqotlarni qo‘llab-quvvatlash hamda ta’lim samaradorligini oshirishga hissa qo‘shish maqsadida 340 dona o‘z muallifligidagi va Inson huquqlari bo‘yicha milliy markazda nashr etilgan huquqiy adabiyotlarni, 54 dona milliy markaz muassisligidagi “Demokratlashtirish va inson huquqlari” jurnallari to‘plamini Akademiya kutubxonasiga tuhfa qildi.
2023 yil 9 oktabr kuni Akademiya Majlislar zalida ushbu kitoblar taqdimoti va rasman topshirishga bag‘ishlangan marosimi bo‘lib o‘tdi. Unda Akademiya rahbariyati, professor-o‘qituvchilar va talabalar vakillari ishtirok etdi.
O‘zbekiston Respublikasi Prezidenti tashabbusi bilan tashkil etilgan Mehnat va ijtimoiy munosabatlar akademiyasi qisqa muddatda salmoqli natijalarga erishib, mamlakatimizdagi yetakchi oliy ta’lim muassasalaridan biriga aylanib bormoqda. Ushbu Akadjemiyani rivojlantirish borasidagi sa’y-harakatlarga o‘z hissamni qo‘shayotganligimdan mamnunman, , — dedi tantanali marosimda so‘zga chiqqan Akmal Saidov.
